హైదరాబాద్: బీఆర్ఎస్ ఆవిర్భావ వేడుకల్లో కేసీఆర్ చేసిన విమర్శలపై ముఖ్యమంత్రి రేవంత్ రెడ్డి అదే స్థాయిలో విరుచుకుపడ్డారు. బీఆర్ఎస్ పార్టీ అంతం ప్రారంభమైందని, ఆ పార్టీకి ఇక రాజకీయ భవిష్యత్తు లేదని ఆయన తేల్చి చెప్పారు.
రేవంత్ రెడ్డి వ్యాఖ్యల్లోని ముఖ్యాంశాలు:
-
ఒట్టు వేయగలరా?: “భవిష్యత్తులో బీజేపీతో కలవబోమని కేసీఆర్ తాను నమ్మే దేవుడిపై ఒట్టేసి చెప్పగలరా?” అని రేవంత్ ప్రశ్నించారు. వీరిద్దరి మధ్య ఒప్పందం లేకపోతే విలీనం గురించి చర్చ ఎందుకు వస్తుందని నిలదీశారు.
-
చచ్చిన శవంతో పోలిక: బీఆర్ఎస్ను ‘చచ్చిన శవం’గా అభివర్ణించిన సీఎం, శవానికి ఎంత అలంకరణ చేసినా అది తిరిగి రాదని ఎద్దేవా చేశారు. 2001-23 వరకు ఉద్యమం, అధికారం ఆ పార్టీని బతికించాయని, ఇప్పుడు ఆ పరిస్థితి లేదన్నారు.
-
కుటుంబ కుంపటి: పంపకాల్లో తేడాల వల్లే కేసీఆర్ కుటుంబంలో విభేదాలు వచ్చాయని, కవిత కొత్త పార్టీ పెట్టడం దాని కోసమేనని రేవంత్ రెడ్డి ఆరోపించారు. వీరంతా ఒకే తానులోని ముక్కలని విమర్శించారు.
-
చావు కోరుకునే మూర్ఖులం కాదు: కేసీఆర్ ప్రాణాలకు ప్రమాదం ఉందన్న ఆరోపణలపై స్పందిస్తూ.. “కేసీఆర్ చనిపోతే ఆయన ఆస్తి గానీ, పార్టీ గానీ నాకు రావు. ఆయన చావు వల్ల లాభపడేది ఆయన కొడుకు, అల్లుడు, కూతురు మాత్రమే. ఆయనే మాకు అసలైన రాజకీయ ప్రత్యర్థి, ఆయన ఆరోగ్యంగా ఉంటేనే మాకు రాజకీయం సులభం” అని సంచలన వ్యాఖ్యలు చేశారు.
-
గత గౌరవం: కేసీఆర్ అనారోగ్యంతో ఉన్నప్పుడు తాను పరామర్శించానని, గ్రీన్ ఛానెల్ ఏర్పాటు చేసి మానవత్వాన్ని చాటుకున్నానని గుర్తు చేశారు.